THUHMAHRUAI
Mizo Academy of Letters chuan a din tirh, kum 1964 atangin a din chhan leh a thil tumte tihlawhtling turin Danpui a siam nghal a. Society Registration pawh a nei a; Registration.No. 8 of 1965-66 under Society Registration Act XXI of 1860 a ni.
Hun inher zel leh hmasawnna milin MAL Danpui chu ni 26.11.2010 khan siam that (amend) a ni a, ni 1.1.2011 atanga hman a ni.
Phuisui leh kimchang deuh zawkin kum 2014 khan siam that leh a ni a, Dantesep pawh siam a ni ta bawk a. Chung Danpui siam that leh Dantesep siam tharte chu kum 2014 November ni 9-a annual meeting-in lungrual takin a pawm a; ni 1.1.2015 atanga hman a ni.
Kum 2015 January atanga hman Danpui-a chuang, member nih dan (membership) chu EC meetingin, ni 19.6.2018-ah leh ni 15.8.2018-ah te ennawn lehin a ngaihtuahtu tur a ruat a; a ngaihtuahtu tura ruatte rawtna chu ni 3.11.2018-a EC meeting chuan pawmin, kum tawpa memberte intawh khawm huna sawi hova pawm tura chhawp chhuah atan a dah a.Tichuan, ni 30.11.2018 kum tawp intawh khawmah khan member nih dan chu a her danglam ta a, chu chu ni 1.11.2018 atanga hman a ni ta bawk.
MAL thil tum leh a din chhante tihlawhtling turin Mizoram hmun hrang hrangah literature lam hawi Pawl a din belh zel a. Lungleia MAL Jt.Headquarters pawh hun eng emaw chen a ding tawh a. District dangah pawh hetiang lam hawi Pawl a ding nual tawh a. Chutih laiin, MAL Danpui Bu-ah hmun danga literary pawl dingte nena inzawm dan leh thawh ho dan chungchangah dan fel taka zam sa a awm lo va. Chuvangin MAL Danpui chu her rema, MAL ruangam leh hmun danga mite nen inzawmna leh thawh hona tur dan siam a tul tih a hria a, a ngaihtuahtu tur a ruat ta a.
Tunlai dinhmun mil leh Mizoram hmun hrang hranga literature lam hawi pawl ding mek leh ding leh zel turte nen, pum khata inzawm a, inkungkaihna leh thawh hona boruak tha zawk a awm a, Thu leh Hla tihchangtlunna kawngah hrui khat vuana kan awm theihna turin, MAL Danpui siam that rawtna, a duangtu turte buatsaih chu ni 11.11.2023-ah EC Meeting-ah uluk taka sawi hova, chul mam a nih leh hnuah, ni 12.12.2023-a MAL kum tawp intawhkhawm, Central YMA Conference Hall-ah sawi ho a niin, lungrual taka pawmin, hman nghal a ni.
Danpui chhungah hian Bung 13 awmin Chang 61 a awm. A bung tinin chang ken neiin, a chang number chu bung hmasaa mi chhunzawm lovin a thara number pek zel a ni. Chang pakhat hnuaiah thu hlawm dang a awmin, kualkhhung chhungah Roman number- (1), (2), (3) a ziah a ni a; roman number pakhat hnuaiah thu ken tepeng dang a awm leh chuan (a) (aw) (b) indawt danin dah a ni.
Dr. Zoramdinthara Prof. R.L. Thanmawia
General Secretary President
Mizo Academy of Letters (MAL)
Kamkeuna
Mizo thu leh hla tiphuisuia, tawng tihmasawna, tichangtlung tur leh Mizo nunphung leh ziarangte humhalha vawng nung zel turin Mizo Academy of Letters pawl hi ni 23.4. 1964-ah din a ni.
BUNG I
Chang 1. Pawl hming.
He pawl hi Mizo Academy of Letters tih a ni ang a, a hming lam tawi chu MAL tih a ni ang a, he Danpuiah hian Academy tih a ni ang.
Chang 2. Pawl nihna.
MAL chu Mizo thu leh hla tiphuisuia, tawng tihmasawna tichangtlung tur leh Mizo nunphung leh ziarangte humhalha vawng nung zel tura Pawl din, politics rawng kai lo a ni.
Chang 3. Pawl Registration.
Firms & Societies Registration No. 8 of 1965-66 chu Jt. Hqrs leh Branch-ten an hmang ve ang a; anmahni pualin Society Registration hran an nei lo vang.
Chang 4. Pawl Thuvawn.
Thu leh hla tihchangtlun.
Chang 5. Pawl thil tumte.
- Mizo tawng humhalh, tihchangtlun leh theh darh;
- Mizote thu leh hla tihhausak leh tihhmasawn
- Mizo Culture humhalh leh vawn nun.
Chang 6. Pawl chhinchhiahna.
- Rin bial pahnih, a pawn zawk leh a chhung zawk inkarah hawrawp puiin, ‘MIZO ACADEMY OF LETTERS’ tih ziakin; a hnuaiah hawrawp têin ‘Thu leh Hla tihchangtlun’ tih ziak a ni a, Mizo Academy of Letters tih leh Thu leh Hla tihchangtlun tih bul leh tawp, a intawhna ding lam leh vei lamah arsi lem dah a ni a. Rin bial chhung zawk kual khhung chhungah lehkhabu zial lem, a chunga ziakfung inkhang dah a ni a, chumi hnuaiah chuan, ‘Estd. 1964’ dah a ni bawk.
- Pawl chhinchhiahna bung hrang hrangten an entir chu heng hi a ni.
Lekhabu zial : Thu leh Hla.
Ziakfung : Thu leh Hla chu ziaka vawn him a ni.
Arsi pahnih : MAL chu thu leh hla vawn him leh tihhmasawn kawngah arsi ang a ni
Chang 7. Pawl Puanzar.
(1) A rawng:
(a) A var
(aw) Van dumpawl
(2) Rawngin a entir:
(a) A var – Literature chu puan var thianghlim tak ang a ni.
(aw) Vandumpawl – Literature chuan leilung hi a fan chhuak a ni.
(3) Puanzar len zawng:
(a) a lian : 4`X3`
(aw) a laihawl : 3`X2`
(b) a te : 2`X1.5`
BUNG II
PAWL INKHAIDIAT DAN
Chang 1. MAL hmunpui (General Headquarters).
Mizo Academy of Letters Pawl, kum 1964-a din hi MAL hmunpui (General Headquarters) a ni ang a; Aizawlah a awm ang.
Chang 2. MAL Jt.Headquarters.
District khawpui tinah MAL din chhan leh a thil tumte tihlawhtling tura MAL Jt.Headquarters din duh chuan MAL hmunpuiah ziaka hriattirna leh MALhmunpui zawmna tur pawisa pein din theih a ni ang a, anmahni lo pawm leh pawm loh chu MAL Council thu a ni ang.
Chang 3. MAL Branch.
Aizawlah emaw,Aizawl District huam chhung khaw dangah emaw, Mizoram pawn, ram dang leh khuaah emaw MAL din chhan leh a thil tumte tihlawhtling tura MAL Branch din duh chuan MAL hmunpuiah zawmna pawisa pein an din thei ang a; an chungchang chu MAL hmunpui EC-in a rel ang.
Chang 4. MAL Jt.Headquarter hnuaia Branch.
A chung, Bung II chang 3-nain a sawi angin, District hmunpui MAL Jt.Headquarters huam chhunga Veng leh khuaah pawh an Jt. Headquarters-ah zawmna sum bi tuk zat pein MAL Branch an din thei ang. MAL Branch din dilna chu Jt.Headquarters Executive Council-in a rel ang.
Chang 5. Pawl zawmna sum bi tuk.
(a) Joint Headquarters-ten MAL hmunpui zawmna sum an pek tur chu Rs.1000.00 (cheng sang khat) a ni ang a, pek nawn a ngai tawh lo vang.
(b) MAL Branch-ten MAL hmunpui emaw MAL Jt.Headquarters emaw (an nihna azirin) zawmna sum an pek tur chu Rs.500.00 (cheng za nga) a ni ang a, pek nawn a ngai tawh lo vang.
Chang 6. MAL Jt. Headquarters emaw Branch-in emaw anmahni inrelbawlna tura tul bik thilah chuan, MAL Danpui kalh lovin; anmahni remchan dan azirin dan te (bye-laws) an insiam thei ang. MAL Hmunpui dan dinglai leh Jt.Headquarters / Branch dan siam inkarah buai a awm chuan MAL Danpui a dingchang zawk tur a ni.
BUNG III
Member chungchang
Chang 1. MAL Member ni theite.
(1) Bung khat, chang 4-a sawi, MAL thil tumte pawm.
(2) MAL nihna pawm.
(3) Thu leh hla lama kut chhuak nei.
(4) Kum 18 aia naupang lo.
(5) A chunga sawi (1) – (4) ang mi, Mizo tu pawh member an ni thei ang.
Chang 2. Patron member.
MAL hmunpui/MAL Jt.Headquarters EC thu khawmin tling leh tha nia a hriat, a mi duh zawng, mi bik hnenah Patron member nihna, kum khat atan emaw dam chhung atan emaw a pe thei ang a, Donor member ni turin pawisa pek ngai a awm lo vang.
Chang 3. A chung, chang 1-na (1)-(4) sawi ang mi, Mizo tu pawhin MAL member nih a dilna chu, a dilna hmuna EC Member tang lai mi pahnih talin a dilna lehkha phekah hming pum ziaka nemnghetin an dilpui tur a ni.
Chang 4. MAL Member nih dilna chu EC thut khawmah ngaihtuah a ni ang a, pawm a nih chuan member ni tura pawisa pek ngai, Danpui Bung V chang 1-in a bithliah zat pein member a ni ang.
Chang 5. MAL member kum 5 ni tawh chinin Life Member nih a dil thei ang. Life member nih dilna chu EC-ah ngaihtuah a ni ang a, EC-in a pawmpui hnuah Life Member ni tura pawisa pek ngai, Danpui Bung V chang 2-nain a bithliah zat pein Life Member a ni thei ang.
Chang 6. Mi tu pawh, member emaw Life member emaw, member ni sa kher lo pawhin, MAL Donor member nih a dil thei ang a. Chutiang dilna chu EC thu khawm-a ngaihtuah ang a. EC thu khawmin rem a tih chuan Donor member ni tura pawisa pek ngai Danpui Bung V Chang 3-nain a bithliah zat chu pein Donor Member a ni thei ang.
Chang 7. Member nihna hrang hrang, Bung V-a sawite hi mahni awmna / duhna hmunah dil theih a ni ang a. A dilna hmuna EC thu khawmin ngaihtuah tur a ni a, an dilna hmuna EC thu khawmin a pawm chuan an dilna hmun MAL Jt. Headquarters-ah emaw, MAL hmunpui (General Headquarters-ah) emaw an member nihna chu a awm ang.
Chang 8. MAL Jt. Headquarters emaw, Branch emawa member nihna man atangin MAL General Hmunpui-ah a hnuaia sawi ang hian theh luh tur a ni.
(1) Membership atangin 50%
(2) Life Membership Fee 20%
(3) Donor Membership Fee- 10 %
Chang 9. Membership Certificate, Life Membership Certificate, Patron Membership Certificate leh Donor Membership Certificate reng reng chu MAL hmunpui atang chauhva pek theih a ni a. Certificate-ah chuan: Hming, pa hming, awmna khua leh District hming te ziah lan tur a ni.
Chang 10. He dan thar hman a nih hmain Life Membership emaw Donor membership emaw MAL Jt. Headquarters-in emaw, Branch/Club-in emaw a lo pek tawh chu pawm nghal a ni ang a, MAL hmunpui zawmna man pek hnuah, MAL Hmunpui atangin Certificate thar pek leh a ni ang.
BUNG IV
Member nihna tihtawp chungchang
Chang 1. Member tu pawh, Pawl dan leh Pawl thil tumte kalh zawnga khawsa lui leh thil ti hriat chian chu a member nihna hlih sak theih a ni ang.
Chang 2. Member nihna inhlihsak thuah a awmna MAL hmunpui emaw, MAL Jt.Headquarters emaw Branch emawa EC-in thu tawp a siam ang.
Chang 3. A awmna EC meeting thu anga MAL member a nihna hlih sak tawh chu hmun dangah member nihna a lo nei tho a nih pawhin chungah pawh chuan hlihsak ve nghal anga ngaih a ni ang.
BUNG V
Pawl mi leh sa nih man
Chang 1. Membership Fee Rs.500.00
Chang 2. Life Membership fee Rs.5000.00
Chang 3. Donor membership Fee Rs.50000.00
Chang 4. Annual Membership Fee Rs. NIL
BUNG VI
PUIPATE
Chang 1. Pawl Puipate
MAL General Headquarters-a Puipate chu hengte hi an ni ang:
(1) President
(2) Vice President
(3) General Secretary
(4) Assistant General Secretary
(5) Treasurer
(6) Finance Secretary
Chang 2. MAL Jt. Headquarters/ Branch Puipate chu hengte hi an ni ang.
(1) President
(2) Vice President
(3) Secretary
(4) Assistant Secretary
(5) Treasurer
(6) Finance Secretary
Chang 3. Puipate hna chanpual chu hetiang hi a ni ang:
(1) President: Pawl inkhawm, Executive Council leh Annual Meeting a kaihruai ang a. Rorel inkhawmah ngaih dan inbuk tawk karah casting vote a nei ang.
(2) Vice President: President a awm lohvin emaw, a theih lohvin emaw Pawl inkhawm a kaihruai thin ang a; President a awm pawhin a remtihnain emaw a theih lohvin emaw Pawl inkhawm a kaihruai thei ang.
(3) General Secretary/ Secretary: MAL Hruaitute thut khawm te, Executive Council thut khawm te leh Kum tawp thut khawm thurel zawng zawng chu a ziak fel ang a, chutiang inhmuh khawm tur pawh chu President nen inrawnin a ko thin ang.
(4) Assistant General Secretary: General Secretary thawhpuiin, a awm loh changin a ai awhin hna a thawk ang.
(5) Treasurer: Academy sum vawngtu a ni a, kum tawp emaw, Annual meeting emaw, thleng hmasa zawk zawk thlen hmaa endik theih turin sum lut leh chhuak a vawngin a ching fel vek ang.
(6) Finance Secretary:Pawl sum lut leh chhuak fel taka vawngin Treasurer nen an thawk dun thin ang.
Chang 4. Mawhphurhna inhlan chhawn thu.
(1) MAL hruaitu (O.B..) tu pawhin dam lohna emaw, ei zawnna vanga hmun danga insawn vang emaw, eng vang pawhin a hna tluang takin a thawk thei dawn lo tih a inhriat chian chuan President hnenah ziakin banna/phatna a thlen ang a. A banna/phatna thu chu EC thu khawmin a ngaihtuah hnuah, thu tlinga ngaia a pawm a nih chuan a hmun ruak hnawh khah thuah EC-in thu a nei ang.
(2) Hna thawh leh zin bo tul vanga MAL hruaitu tu pawhin thla khat/ hnih aia rei Aizawl/ District khawpui/ Khua chhuah san tur a ni tih a inhriat chian sa chuan, President hriatpuinain hruaitu dang remchang apiang hnenah mawhphurhna a hlan tur a ni. Chutianga OB dang hnena mawhphurhna hlan lailawktu chu a lo kir/hawn leh hun hunah a mawhphurhna chu hlan let leh kher ngai lovin a chelh zui leh ang.
(3) Puipate zingah tu pawh, term laklawh laia a nihna chelh zui remchang lova a awma, a nihna (post) a chhuahsan avanga hmun ruak chu Puipate zing atanga siam rem a nih chuan, chumi avanga hmun lo ruak leh hnawh khah thu pawh EC ngaihtuah tur a ni ang.
Chang 5. Pawisa hman chungchanga President thuneihna.
Tul bik leh hmanhmawh thlak, EC rel hman loh thilah President-in pawisa Rs.10000/- thleng hmantir / hmang turin thuneihna (discretionary power) a nei ang.
BUNG VII
Executive Council
Chang 1. Academy inrelbawlna kengkawh turin Executive Council (Danpuiah hian Council tih mai thin a ni ang) hetiang hian a awm ang:
(1) Pawl Puipate (OB);
(2) Pawl Puipate ruat, mi 15 atanga 20 thleng.
(3) Pawl Puipate ruat, Senior Adviser-te.
(4) Pawl Puipate ruat Donor Member aiawh pakhat.
(5) Editor, Thu leh Hla (EC pawn lam mi ruat a nih chuan).
Chang 2. Council mawhphurhna:
(1) Council hian Academy pawl aiawhin hna a thawk ang a, pawl kalphung nghawng thei thilah erawh chuan General Body Meeting kovin memberte ngaih danin a kal ang.
(2) Council hian Minute bu vawngin, pawl rorel inkhawm thu tlukna ziah a ni ang a; President leh General Secretary ten an (hming) an ziah (sign) hnan thin ang.
(3) Council hian anmahni pui turin a tul hunah Board/Committee a din thei ang a, thuneihna tawp erawh chu Council kutah a awm ang.
(4) Council chuan a duha, tul a tih chuan Academy tan thawktu a la (ruai) thei ang.
(5) Council chuan thu leh hla lama inhmang pawl dangte pawh affiliation a pe thei ang.
(6) Council chuan Mizo tawng te, thu leh hla te humhalha, tichangtlung zel turin hetiang hian hna a thawk ang.
(a) Seminar, lecture, workshop, symposium, debate, leh tul dangte a huaihawt thin ang.
(aw) Thu leh Hla thiamte kawmna hun a huaihawt thin ang.
(b) Lehkhabu te chhuahin chanchinbu pawh a chhuah ang.
(ch) Tawng dang lehkhabu Mizo tawnga lehlin leh, Mizo tawng lehkhabu hnam dang tawnga lehlin te pawh a thawk ang.
(d) Lehkha ziak mi leh a chhuahtu chawimawi phute hnenah chawimawina (award) leh lawmpuina thil pek te pawh a pe thin ang.
(e) A thil tumte tihhlawhtlin nana tangkai turah chuan State leh ram pum huap pawl leh University te a thawhpui thei ang.
(7) Council chuan Mizo Culture humhalh leh vawn nun kawngah a tul chuan huang a zauh thin ang.
BUNG VIII
Pawl intawh khawm koh leh rorel chu a hnuaia sawi ang hian kalpui tur a ni:
Chang 1. Pawl Din Champha: MAL din champha (Foundation Day), April ni 23-ah kum tin awmni khamin Pawl intawh khawm buatsaih \hin tur a ni; April ni 23 hi a remchan loh chuan a hma emaw a hnu emaw hun remchang Council-in a ruat thei ang.
Chang 2. Kum tawp intawh khawm: Academy hnathawhte thlir let tur te, MAL hmachhawp duang tur te, inthlan kuma Puipate thlanna buatsaih tur tein pawl pum pui intawh khawm (annual meeting) kum tin, November-December chhungin a huaihawt thin ang a, tih tur tul dang awm apiang, Academy Award hlan, rorel leh tul dangte a ti thin ang.
Chang 3. Pawl intawh khawm dang: Council chuan Pawl kalphunga thil rel ho tul bik awma a hriat chuan, tul a tih hun apiangah Pawl Intawh khawm (General meeting) a ko thei ang.
Chang 4. Pawl intawh khawm rawt thu: MAL member 20 chin chung lam inthurualin President hnenah General meeting ko turin an ngen thei ang.
Chang 5. Council thut khawm thu: Council chu a tul hun apiangin an thu khawm thin ang a, kum khatah vawi hnih tal an thu ngei tur a ni. Pawl thil tih turte duangin, hmasawnna a neihte pawh a thlir let thin ang.
Chang 6. Council thut khawm rawt thu: Council member pahnih chinin President hnenah ziaka thlenin Council thut khawm an rawt thei ang.
BUNG IX:
Puipate thlan dan leh an hun (term) chhung
Chang 1. Inthlan chungchang:
(1) Council-in a ruat lawk tumah awm chuang lova kohhran Upa thlana inthlan emaw, Council-in a ruat lawk, mi 15 leh mipui lo kal khawmte atanga rawt chawp mi 3, (an vaiin mi 18) zing atanga thlan, a eng zawk zawk pawh a hman theih ve ve ang.
(2) Thlan theih turte hming ruahman lawk leh lawk loh thu-ah Council-in thu tawp a nei ang a, inthlan hma thla hnih la awmah a eng zawk nge hman tur tih a rel fel thin ang.
(3) Academy Puipate chu Annual Meeting-ah inthlanpuitu tura Council-in a ruatte kaihhruainain, Secret Ballot hmanga thlan thin tur a ni.
(4) Heng inthlan dan kawng hnih, a hnuaia ziah (a)&(b) hmang hian inthlan thin a ni ang a, inthlan hmain Council thu khawmin a duh zawk a tichiang thin ang:
(a) Pawl Puipate chu nihna (post) mal mala thlan tur. He dan hi hman a nih chuan, vote tla zawng zawng atanga chhiara vote hmu sang ber (thlangtu ngah ber) chu tlinga puan a ni ang.
(aw) A mal mala (post by post) thlang lova, paruk thlan chhuah phawta, a hnua nihna insiamrem tur. He dan hi hman a nih chuan inthlana vote hmu sang sang paruk chu tlinga puan an ni ang a, chung thlan chhuahte chuan inthlan atanga ni thum chhungin nihna an insiam rem tur a ni.
(5) Academy Puipate chu MAL member hmun hrang hrang atanga lo kalten an thlang thin ang.
(6) MAL Joint Headquarters inthlanah MAL hmunpuia member (a inthlang tur Jt.Headquarters-a member ni lo chuan vote an nei thei lo vang a, Branch te erawh chuan vote 6 an nei ang.
(7) Branch inthlanah Jt.Headquarters leh MAL Hmunpui mi leh sa, an Branch-a member nihna nei lote chuan vote an nei lo vang.
(8) Jt.Hqrs/Branch pawhin MAL hmunpui inthlan dan hi an zawm ve tur a ni ang.
(9) MAL hmunpui Puipa turin Aizawl pawn lam mi (Aizawla cheng nghet ni lo) chu thlan theih an ni lo vang.
Chang 2. Dinhmun (post) chelh hun chhung:
(a) Pawl Puipate leh Executive Council member-te hun khat (term) rei zawng chu kum hnih pumhlum a ni ang.
(aw) Pawl Puipate chu an nihna ngaiah a zawnin tum (term) thum bak thlan theih an ni lo vang.
Chang 3. Mawhphurhna inhlan hun: Puipa thar leh a hluite chuan inthlan atanga ni 15 chhungin mawhphurhna an inhlan chhawng tur a ni.
Chang 4. Hmun ruak hnawh khah thu:
(1) Eng vang pawhin puipate zingah a/an nihna chelh zui thei lo an awm chuan, a/an hmun ruak hnawh khah thuah Council meeting-in thu a nei ang.
(2) Eng vang pawhin Council member zingah an nihna chelh zui thei lo an awm chuan a/an hmun ruak hnawh khah thuah Puipaten thu an nei ang.
BUNG X:
Danpui tihdanglam dan:
Chang 1. Danpui tidanglam turin Council meetingin rawtna a siam thei ang.
Chang 2. Member 20 aia tlem lo inthurualin Executive Council-a ngaihtuah turin President hnenah rawtna an siam thei ang.
Chang 3. MAL Jt.Hqrs emaw, Branch malin emaw MAL President phalnain MAL hmunpui lamah rawtna an thlen thei ang.
Chang 4. Danpui tihdanglam rawtna chu Council-in a thlir hmasa ang a, tihdanglam rawtna chu pawm a nih chuan fel taka ziakin Annual meeting-ah pharh a ni ang. Chutiangah chuan a rawttuin an rawtna chu rawt chhante sawiin an sawi hawng phawt ang.
Chang 5. Pawl danpui tihdanglam rawtna chu Annual Meeting-a kal member zatve aia tam (simple majority-in) rem an tih chauhvin pawm a ni ang.
BUNG XI
Chanchinbu leh lehkhabu chhuah.
Chang 1. Academy chuan thla tin chhuak chanchinbu, ‘Thu leh Hla’ a chhuah ang a; Editorial Board tur Puipaten an rawt ang a, Council-in ngaihtuahin thu tawp a siam ang.
Chang 2. Academy member zawng zawng chuan MAL Chanchinbu,‘Thu leh Hla’ hi la theuh tura ngaih an ni a, thu ziakte pawh thawh thin tura beisei an ni.
Chang 3. Academy chuan tul a tih chuan lehkhabu a buatsaihin, a chhuah thei ang.
Chang 4. Lehkhabu chhuah leh Chanchinbu tihchhuah thuah Jt.Hqrs leh Branch-te chuan MAL hmunpui lam rem tihna lak hmasak a ngai lo vang.
BUNG XII:
Pawl thiah thu.
Chang 1. MAL thiat tur chuan Anual Meeting-ah member zawng zawng hmun thuma thena hmun hnih tling kal khawm, a kal khawm hmun thuma thena hmun hnihin thiah an tihtluk chauhvin thiah theih a ni ang.
Chang 2. Eng vang pawhin Academy hi thiah a nih chuan a thil neih, khawih chet theih leh khawih chet theih lohte bakah a lei batte nen (a awm chuan) a zavaiin Mizoram Sawrkar hnuaia Nodal Department,Art & Culture Department kutah a lut vek ang.
BUNG XIII
Dantesep siam thu
Chang 1. Council chuan Academy Danpui zulzuiin a thil tum tihpuitlin kawnga chak zawka Pawl a kal theih nan Dantesep a siam thei ang.
Chang 2. MAL hmunpui, General Headquarters-in Dantesep a siam chu Jt.Hqrs leh Branchten an zawm/hmang ve tur a ni.
He danpui ennawn hi Mizo Academy of Letters (MAL) Annual meeting ni 12.12.2023, Thawhlehnia Central YMA Conference Hall,Tuikhuahtlanga neih chuan lungural takin a pawm a. Pawm ni atanga hman tan nghal a ni.