R.L.Thanmawia hi kum 1954, June 20-ah Darlak khuaah a lo piang a. A pa chu Vanlalliana niin a nu chu Vanlalliani a ni a. R.L. Thanmawia hi lehkhathiam thei tak a ni a, kum 1975-ah Matric a pass a, kum 1979-ah B.A.-a pass a. Kum 1981-ah M.A. pass-in, kum 1989-ah Doctor of Philosophy hmu-in a Thesis chu ‘Development of Mizo Poetry’ a ni.
Kum 1981 atanga 1983 thleng Aizawl College-ah Lecturer-in a awm a. Kum 1983-2004 thleng Pachhunga University College-ah thawk lehin, chumi hnu kum 2004 atang khan Mizoram University-ah thawkin Reader & Head of Department hna a thawk chhunzawm a. Mizoram University-a Mizo Department bul tantu leh khai dingtu zinga mi a ni. Kum 2008 atangin Professor-ah a kaisang a, kum 2011-2016 chhungin Mizoram University-ah Controller of Examination-ah te pawh a lo thawk lawp lawp tawh bawk.
Thu leh hla chanchinbu Editor-ah kum 12 chhung a tang a. Mizo Academy of Letters (MAL)-ah Secretary hna hun eng emaw chen a chelh a. Tunah hian Mizo Poetry Society (MIPOTY)-ah President a ni mek a, thangthar hla phuah lama tui leh thiam tak takte hui khawmtu tangkai tak a ni. Kohhran leh pawl hrang hrangah inhmanna a ngah hle.
Sap tawng leh Zotawngin lehkhabu 28 a chhuah tawh a, lehkhabu 20 chuangah thuziak a thawh a, article 100 chuang a ziak a, lehkhabu thehlep deuh bu 5 a ziak bawk. Hla sak chi leh hlahril (Poem) 100 chuang a phuah tawh a. International leh National level Seminar hrang hrangah paper eng emaw zat a ziak bawk.
RL Thanmawia hian lehkhabu rotling leh hlu eng emaw zat a ziak a, a lehkhabu-ah hian essay te, ama hla phuah leh mi hla phuah a thlirna te, a inpuanna leh sunna thu ngaihnawm tak tak a khung hlawm a ni.
Kum 2012 khan India rama Civil mite chawimawina sang Padma Shri in Literature and Education chu India President hnen atangin a dawng a. Mizo Academy of Letters chuan kum 2016 khan Academy Award a hlan leh bawk. Tunah hian a chhungte nen Aizawl, Ramhlun South-a an in, ‘Din Din Heaven’-ah a fate nen an cheng mek a ni.