March ni 4, 1917 khan Champhai bul Hmunhmeltha khuaah a piang a, a pa chu Doliana niin a nu chu Aibuani a ni. Unau pathum zinga a upa ber a ni a, nupui Thangdailovi nen fa 4 an nei. Rethei tak chunga lehkha zirin Mizo zinga B.Sc (Hons) leh B.D. hmasa ber a ni a. Kum 1946 khan Pastor a ni a, Mizorama Presbyterian Kohhran hruaitu pawimawh, a hnarkaitute zinga mi a ni a. Kohhran rawngbawlna piah lamah ram leh hnam tana theih tawp chhuah mi, kawng hrang hranga mite râwn hlawh leh an thu lakna hnâr a tling.
Pathian thu lam leh thuchheh dang dang a ziak thin a, Mizote Pathian thu chhui zauna leh hrilh fiahna lama châwmtu pawimawh tak a ni. Article ngaihnawm tak tak leh lehkhabu eng emaw zat a ziak a. Chung zingah chuan – Bilat lei hnathawh dan, Genesia Thlan Chhuah Hrilh Fiahna, Politics Zirna, Mizorama Pathian Thiltih Mak, Chanchin Tha Johana Hrilh Fiahna, Marka Hrilh Fiahna, Kan Bible Hi, Thukhawchang Min Pekte Hi, I Ni Min Pekte Hi, Lehkha Te Pasarih, Random Notes, Thian Lehkhathawn, Pi Pute Biak Hi te hi han tar lang ila. A lehkhabu ziah zinga ‘Kan Bible Hi’ tih chu MAL Book of the Year, 2005 atana thlan a ni nghe nghe.
Kum 1943 March ni 4-ah Thangdailovi nen inneiin Zarkawt, McDonald Hill-ah an khawsa a, fapa 3 leh fanu 4 an nei a, a fapate zinga pahnih hian an puitlin hmain an thihsan a, a nupui hian March ni 6, 2003 khan a boralsan tawh a ni. Rev. Zairema hian lung lam natna a vei a, December ni 17, 2008 zing dar 6 khan kum 91 mi niin a lo chawl ve ta. A thih hnu kum 2009 khan, a lehkhabu ziah ‘Pi Pute Biak Hi’ tih chu chhuah leh a ni.