A. Sawihlira hi Peter Dardawna leh Elizabeth Suakchhungi te fa niin kum 1931 khan Thinglian khuaah a lo piang a. Kum 1943 khan Zoram hmar bial pumpuia pawl thum exam-ah pakhatna a ni. Kum 1948 khan pawl rukah Zoram pumah pakhatna a ni bawk. High sikula a zirna pawh a duai lo hle a, Matric exam-ah pawh Mathematics, Science, Commerce, Geography leh Lushai-ah letter mark a hmu!
Champhaiah zirtirtu hna a thawh hnuin kum 1973 khan Science Consultant-ah dah a ni a, kum 1977-ah Science Promotion Officer-a hlan kai a ni. Kum 1989 khan SCERT Joint Director a ni a, a pension hnuin kum 1995-1997 thleng Mizoram Board of School Education, President hna a chelh bawk.
Kum 1975-1992 chhung khan Science zirlaibu 37 a ziak a, kum 1983 hma kha chuan MBBS leh BE zir turin Zofate’n Zoram Quota kan hnawh khat thei meuh lo va. Kum 1985 hnu lamah erawh A. Sawihlira hma lakna avangin zirlai lak sen loh khawp Zofate hian kan nei ta hial a ni.
A theihna leh thiamna, a finna leh a taimakna tam tak Zofate’n kan mamawh em em laiin, Mathematics, Science & Technology lama Zofate rual pawl phaka min hlangkaitu leh, lehkhabu 40 lai mi ziahsaktu, kan zahkhawrawi A. Sawihlira chuan kum 2000, January ni 8-ah chatuan ram min pansan ta a ni.