Lalthangfala Sailo hi Lungdar lal Dohleia fapa niin kum 1933, July ni 16-ah a piang a. Kum 1959-ah St Xavier College, Calcutta khawpui atangin BA a zo a. Chumi kum chuan St Paul’s High School, Aizawlah zirtirtu hna a thawk nghal a. Lehkha zir zawm lehin thiamna lamah MA a zo a ni.
St Edmund College, Shillong-ah te, UCC, Barapni-ah te, Champhai College-ah te hna a thawk a. Lecturer leh Principal hna chi hrang hrang a thawh tawh bakah, University (NEHU-MC)-ah Deputy Registrar hnate thlengin a thawk tawh a. Tunah chuan a hna lamah pension tawhin, Chaltlang, Aizawl-ah a nupui fanaute nen an khawsa mek a ni.
Thu leh hla lamah hian a inhmang nasa hle a, Mizo tawng leh literature tihhmasawnna kawngah thahnem a ngaiin, tha pawh a thawh hlawk hle. Mizo Academy of Letters-ah kum 1988 khan President-ah thlan a ni a, tun thleng hian he pawlah hian a la inhmang nasa hle. Mizo Language Board te, Mizo Publication Board leh Committee pawimawh dangah a tel nasa hle bawk. India ram pum huap Sahitya Akademi-ah General Council Member a ni tawh a, Sangeet Natak Akademi-ah Member a ni tawh nghe nghe bawk.
Lemchan thawnthu ziak thiam a ni a, a kutchhuak zinga lar deuhte chu ‘Sangi Inleng’ (1963), ‘Liandova te Unau’ (1969), ‘Thangliana Len’ (1999), ‘Kalkhama Lianphunga’ (1999), tih te leh ‘Kan Ram A Ni’ tihte a ni. Lemchan thawnthu ziah lamah a inhman nasat avang hian SNA chuan Playwriting bikah Academy Award a dawntir hial a, Zofate zinga dawng hmasa ber a ni.
Hla 50 chuang a phuah a, lemchan 10 chuang a ziak a. Sangeet Natak Akademi Award 2007, Padma Shri 2009, Bharat Adivasi Drama Award 2012 leh Pu Buanga Award 2015 te a lo dawng tawh bawk.