Kum zabi 20-na (1900-2000) chhunga Mizo zinga thuziak thiam ber ‘Writer of the Century’-a puan Khiangte Chawngte Lalvunga hi Aizawl lal Pu Hrawva leh Pi Lalluii fa sawm pakhat zinga a upa ber ni turin, ni 27, December 1929 (Zirtawpni) khan a lo piang a. He khawvelah kum 65 a cham pum hlum hma deuhin kum 1994 October 10-ah he khawvel hi a chhuahsan ve leh ta a ni.
K.C. Lalvunga hian nupui a nei dawn nge a nei dawn lo, nei pawh nise fa a nei kher ang em tih pawh a hriat hma hauh atangin, thu leh hla a ziah apiangin a hmingah Zikpuii Pa tih a hmang thin a, he hming hi a larpui ta hle a. Mizo literature-a hming dai ngai lo tur hming hi a put hlen phah ta a ni.
K.C. Lalvunga leh Pi Darhmingthangi hi kum 1948 September ni 5-ah an innei a, fapa 4 leh fanu 4 an nei a, heng an fate hi he khawvel a chhuahsan hma khan an la dam kim vek a ni.
K.C.Lalvunga hian zirna hi Aizawlah bul a tan a, Boys ME School leh Mizo High School-a a zir zawh hnu-ah, kum 1948-ah Matric a zo a, chumi kum chuan nupui a nei a. A zirlai chu chawlhsanin hna a thawk tan a, hna a thawh hnu leh chhangchhepa a nih hnuah College chu Shillong-ah a zawm leh hnuhnawh bawk a ni. Dinhmun hrang hrang a chelh hnem hman hle a, chung zinga a langsar deuhte chu :-
i) Editor, Zoram Thupuan 1954-56
ii) President, MZP 1954-55
iii) Sub-Inspector of Schools 1955-56
iv) Headmaster, Saitual H/S 1959-62
v) Executive Council Member, MAL 1993-94
Heng a chunga dinhmun pawimawh tak takte a thawh hnu kum 1962-ah Indian Foreign Service (IFS)-ah a inziak tling a, Mizo zinga a hmasa ber a ni. IFS a nih chhunga a hnathawhna-te han sawi leh i la :-
i) 3rd Secretary, Spain 1963-65
ii) 2nd Secretary, Chile 1965-66
iii) Under Secretary, Delhi 1966-69
iv) 1st Secretary, Australia 1969-73
v) 1st Secretary, Kathmandu 1973-75
vi) Director, Ministry of External Afffairs 1975-76
ah te awmin hna hrang hrang a thawk a, heng hna chi hrang hrang a thawh hnu kum 1977-ah chuan Ambassador puitlingah a kaisang a, Ambassador puitlinga a kai hnua a hnathawhte han tarlang leh i la :
i) Venezuela 6 Months (1977)
ii) Colombia 1977-80
iii) Oman 1980-83
iv) North Korea 1983-86
v) Jamaica 1986-90
A chunga kan tarlan takte a thawh hnu kum 1990-ah chuan a hna atangin a pension a, Aizawlah a awm ta a ni.
K.C.Lalvunga chanchin kan sawi apianga kan sawi hmaih hauh loh tur chu a awmna hmun apianga kohhran a bel tlat hi a ni a. Heng hna ropui tak tak a thawk chung pawh hian kohhran a bel tlat a, Santigo, Canberra, India leh Kathmandu-a a awm lai hian kohhran Upa atan thlan a ni.
K.C. Lalvunga hian sawrkar hna ropui tak thawkin awm mah se a ram leh hnam tana thahnemngai takin lehkhabu, thawnthu, hla leh essay tam tak a ziak a, heng a lehkha ziah leh a hla phuahte hi Mizo Literature-a pawimawh tak takte vek an ni a, kam hnam literature-in kawng thar a zawh theih nana tha thawh hlawk berte zinga mi, hnam dang literature min sih hmuhtute zinga mi a ni.
K.C. Lalvunga hian hla 17 a phuah a, heng a hlaphuahte hi ‘Zozam Par’ tih bu hmingpuin kum 1993 khan chhuah a ni a, mi hlut pawh a hlawh hle. A hlaphuahte bakah hian a essay ziahte chu B.Lalthangliana chuan lakhawmin ‘Zikpuii Pa Kutchhuak’ tih hming puin a chhuah a, Essay hi 50 vel lai a ziak anga chhut a ni. Hengte bakah hian a thawnthu ziah – Lungrualna Tlang, Nunna Kawng Thuam Puiah, CC Coy No. 27 leh a dangte chu a chhuah nual tawh bawk. Zikpuii Pa hian thawnthu hi 12 vel lai a ziak anga chhut a ni.