PS Chawngthu tia, Zoram khawvelin kan lo hriat lar tak, Pahlira Sena Chawngthu hi Mission Veng kohhran upa Ch. Pasena leh Chawntuahi te fapa niin, kum 1922 December ni 1 khan a lo piang a. A pian tirhin a hming chu ‘Pahlira’ tiin an ziak a. He a laiah hming leh mite’na an koh duatna tlanglawn ber ‘Sena’ tih leh, a hnam hming ‘Chawngthu’ khaikhawm turin Pahlira Sena Chawngthu tih hming a lo pu ta a ni.
Sikulsen leh Boys ME School, Mission Vengah-te lehkha a zir thin a, Middle (Pawl 6) a pass hnuin a pain High School lut turin a la naupang deuh e tiin Teacher’s Training Class, Aizawlah a luhtir phawt a, chumi hnuah pawh sikul la kai mai lovin Middle Vocational Class, Aizawlah a kal leh a. Shillong Govt High School-a Pawl 7 zir chhunzawm turin Sairang kawnga kalin Shillong lam a pan a, kum 1939-ah pawl 9 a pass.
Kum 1940 khan a hriselna that tawk loh avangin pawl 10 a zir chu zo hman lovin Aizawlah a haw a. Hemi kumah hian Burmai Oil Company-ah Interpreter hna thawkin Mizoram khaw hrang hrang a bial a. Kum 1943-ah Indopui II-na a lo chhuah khan Royal Indian Air Force a zawm a, rei thawk lovin a bansan leh ta a ni.
Kum 1944 atangin music lamah a inhmang tak tak ta a. Calcutta lamah chhuk thla-in band party pakhat Roman Francisco and his Hawaiian Serenaders pawl tawng fuhin a tel ve ta nghal a. He band party-a kum 13 zet a awm chhung hian hlate pawh a phuah nual a. Pakistan khawpui Karachi-ah awm hmun khuarin Singapore, Bangkok, Jakarta, Hongkong te; Middle East lamah Lebanon, Damascus-ah leh Cairo leh Rome khawpuiah-te rimawi tumin an zin kual thin.
He band party hi kum 1955-ah chhuahsanin Mizoramah a lo chuang chhuak a, ngawr (TB) natna a vei avangin Durtlang damdawi inah a awm ta ren rawn a. A that chhuah leh hnuah chuan Zoramah awm rei lovin kum 1957 khan All India Radio Mizo programme, Guwahati-a hawn a nih khan announcer-ah a lut nghal a. Mizo zinga thawk hmasa ber niin kum 1982-a a pension thleng khan a thawk ta a ni.
Kum 1962-ah Shillong-ah a insawn chho a, kum 1965 khan Disola Lyngdoh nen inneiin fapa 2 leh fanu 4 an nei.
PS Chawngthu hian kum 18 mi vel a nih atangin hla a phuah tan a. Amahin a sawi angin sap hla leh hnam dang hla thluka Mizo hla phuah pawh a nei nual. Hla lenglawng, Lengzem hla leh Pathian fakna hla leh Hlahril 50 vel a phuah a. Heng a hla phuahte avang hian thu leh hla lama chawimawinate pawh a dawng nual. Kum 1989 khan Mizo Academy of Letters chuan Academy Award a hlan a. Kum 1999 khan India sawrkarin Padma Shri chawimawina a hlan leh bawk.