Darchhawna hi Sapkunga leh Tlangziki te fapa ni turin kum 1936, January ni khat khan Lunglawn (Lunglei)-ah a lo piang a. Hmingthanzami nen inneiin, fapa 2 leh fanu 2 an nei a, Kulikawn, Aizawl-ah an cheng mek a ni.
Zirna lamah chuan kum 1962 khan MA (History) a zo va. Kum 1972-73 khan Melbourne leh Sydney, Australia-ah Theological Training a zo bawk. Pa titi thiam tak a ni a, ram a fang zau tawhin, a thil hmuh leh hriatte chu ngaihnawm tak leh nuam ti takin a sawi thin a ni.
Hmun hrang hranga zirtirtu hna thawh hnuah Lunglei College leh Pachhunga University College-ah Principal hna a thawk a. Kum 1987 atangin Art & Culture Department-ah Director a ni a, kum 1993-ah a pension a ni. A pension hnu hian Johnson College-ah Principal hna a thawk leh bawk. Mizorama college pathuma Principal hna a thawk thei hi a chhuanawm hle.
Darchhawna hian Mizo thu leh hla a tuipui hle a, hla leh zai lam pawh a tui pui hle bawk. Lehkhabu 10 chuang a ziak a, hla 20 chuang phuah a, article 200 chuang lai a ziak tawh bawk. A thuziak thlan chhuahte chu Beisei Ram tiin a bu-in a chhuah nghe nghe a ni. Pathian thu lo zir tawh a nih avang hian a lehkhabu thenkhat hi Pathian thu lam hawi a awm nual bawk.
Mizo History Association chu kum 1980, September ni 23 khan Darchhawna office chamber, Officer On-Special Duty, NEHU, Mizoram University Campus-ah din a ni a. He pawlah hian Preisdent a ni nghal a, he hna hi hun rei tak chhung a chelh a ni. Hei bakah hian Mizo Academy Letters leh pawl hrang hrangah chanvo pawimawh tak tak a chelh bawk a ni.
Thu leh hla lama a thawhhlawk em avangin kum 2005 khan Padma Shri in Literature a dawng a. Mizo Academy of Letters (MAL) chuan Academy Award a hlan bawk.