Vanchhawng Thangzama (V. Thangzama) hi kum 1935, March ni 23 khan Sailo lal, Lalzidinga khua, Ngopa khuaah a piang a. A pa chu Upa Vanchhawng Thuama niin, a nu chu Laichhungi a ni. An unau hi 10 niin mipa 4 leh hmeichhia 6 an ni. Ngopa khuaa seilian a ni a, lehkha thiam thei tak a ni.
Kum 1960 khan Pi Vanlalengi, Dawrpui, Aizawl nen inneiin fa 5- mipa 4 leh hmeichhia 1 an nei a. Kum 1972-ah Dawrpui Vengthar, Aizawlah pemin tun thlengin an la khawsa a ni.
Primary School leh Middle School hi Ngopa-ah kalin a thiam thei ber pawl a ni a, High School erawh chu Govt High School, Aizawlah a kai thung. I. Com (Intermediate of Commerce, tuna Class 12 ang hi) hi Imphal-a college hawn thar DM College-ah a zir a, chumi hnuah Calcutta-a City College-ah B. Com zir lehin kum 1958 khan a zo a ni.
Kum 1959, October ni 20-ah Govt Higher Secondary Schhol, Aizawl-ah Commerce zirtirtu hna a thawk a, kum 1961 thleng a thawk. Chumi hnuah Assam Civil Service-ah a lut a, Mamit, Saitual leh Nowgong & Garo Hills-ah te BDO a ni a. Tura District-ah Sub-Divisional Planning Officer a ni tawh bawk. Mizoram Union Territory a lo nih khan Assam Civil Service atangin Mizoram Civil Service-ah inletin, kum 8 chhung Under Secretary leh Deputy Secretary hna a chelh a. Sawrkar Department hrang hrangah Director hna leh chanvo pawimawh tak takte a chelh bawk. Kum 1994, January ni 1 atang khan a pension ta a ni.
V. Thangzama hi a naupan lai atanga hla lama tui mi a ni a, Western music hi a tuina lam tak a ni nghe nghe. Hun hrang hranga mamawh chi hla thahnem fe a phuah a, Solfa a thiam a, hla thu leh thluk inmil phuah thiam tak a ni. Hla hi a saka sak chi leh a chhama chham chi hla 40 vel lai a phuah a, a hla phuah thenkhat hi sap tawnga lehlin a ni tawh bawk.