Miten Mizo Academy of Letters (MAL) an hriatna ber pakhat ‘Thu leh Hla’ (A Monthly Literary Journal of Mizo Academy of Letters) hi a ni.
MAL Annual General Meeting vawi khatna, April ni 3 , 1965-a neih chuan, “Kan pawl hian chanchinbu chhuah ve tawh ila, a hmingah ‘THU LEH HLA’ ni se. Kum khatah vawi li chhuah hram ni se. Bu khat cheng khat man ni se tih a ni, a hmasa ber chu July 1965-a chhuah ni rawh se,” tiin an rel a.
Hetianga an rel ang ngei hian ‘No. I Fürchhuak 1965’ chu chhuah a ni a, Editor hmasa ber J.F. Laldailova a ni a, ZP. Press, Aizawl chhut, copies 500 a ni nghe nghe.
Mahse, chhuah zui a ni ta lo a, 1974 October khân chhuah leh hrâm a ni a, Editor ‘Thu Khawchang’-ah ti hian ziah a ni, …. “Pawl la insingsak fel loh nen, ram buai khân a rawn nang ta a, kum kaw chhúng chu a reh ta vang vang a. Nimahsela kan pawlah milunglêng tak tak an lo awm hlauh va, chumite luhlulna avang chuan MAL leh a Magazine chu a lo nung chhuak leh ta a ni,” tiin. Editor J.F. Laldailova, Jt. Editor Prof. Siamkima te an ni nghe nghe.
Kum 1975-a chhuah Thu leh Hla copy hlui kan la hmu zo lo a, minute bu-ah pawh an chhuah thu a lang lo a, a chhuak lo a ni maithei. Kum 1976 March, July, September, October erawh chu a copy hlui kan nei thei thung. Kum 1977-ah a chhuah loh avangin Committee chuan pawi a ti hle a, tih-nun leh dân tûr an ngaihtuah nghâl a ni. Kum 1978 January atang chuan chhuah tan leh a ni a, tluang takin a kal a, August 1988 thleng chhuah zel a ni a. Editor atan Prof. Siamkima a ni a, a vawrh sangin miten an chhiar duh hle, mahse sum lam harsat avangin September 1986 atang chuan a lo tawp leh ta rih a ni.
Kum hnih lai MAL a mutthluk hnua tharthawh leh a nih hnu rei lo têah ‘Thu leh Hla’ Journal pawh chhuah thar leh ngei ni se tiin E.C. chuan a rel a. A thar hlaka chhuah a nih dawn avangin tûn hmaa chhuak tawh nen sum leh paiah inhnamhnawihna nei lo tûr te, a volume erawh chu chhunzawm zêl ni se, a size pawh a ngai ni se a ti bawk a. A enkawltu atan hengte hi ruat an ni: Editor – Pu R.L. Thanmawia, Joint Editors – Pu R. Lallianzuala leh Dr. R. Zokhuma te an ni. Tichuan, July 1988 atanga chhuah tanin, vawiin thleng hian bahlah hauh lovin tluang takin chhuah zel a ni ta.
A rei ta deuh hlek bawk a, chhuah thar leh tirh lai boruak tlem sawi ila a tha âwm e. Editorial Board zinga tlema la thalai deuh pathumte hian a hlawhtlin ngei theih nân tan a la hle a, sawrkar office lian deuh deuhah kalin Department leh mi mal laksak turin an ngen a, ni eng emaw zât an vak kual a, copies 1,000 tal la zo theitu awm thei turin an bei fat fat a. Veng hrang hranga Branch YMA leh KTP lama an thiante an dap bawk a, Pu R.L. Thanmawia leh Pu R. Lallianzuala te an tangkai lehzual a ni.
Kum 1988 July atanga March 2000 thleng chu Pu B. Lalthangliana kutah Thu leh Hla Journal senso te, hloh leh hlep te thlengin dah a ni a, Managing Editor, Publisher leh Printer nihna te a kawp vek a, a thawkrim hle. Neitu nihna erawh chu MAL kutah a awm reng thung a. Amaherawhchu, kum 2000 April atanga vawiin thleng hian MAL kutah a awm ta vek hlawm a, tluang taka a chhuah zêl avangin a tihzia hle. Editor lo ni tawh te
- J.F.Laldailova
- Pu H.K. Bawichhuaka
- Pu Siamkima
- Prof. R.L. Thanmawia
- Pu B. Lalthangliana
- Prof . Laltluangliana Khiangte
- Pu R.V. Lalmawia
- Pu C. Chhuanvawra
- Pu Lalzuia Colney
- Pu Lal Rinawma
- Pu C. Chhuanvawra
- Dr. Darchuailova Renthlei
- Dr. Zoramdinthara
- Rev. Dr. Chuauthuama
‘Thu leh Hla’ (A Monthly Literary Journal of Mizo Academy of Letters) hi kum 48-a upa a ni mek tawh a. Registrar Newspaper of India (RNI) No MIZ MIZ/2010/33321 a register a ni a, Postal registration No. MZR/93/2019-2022 a nei mek bawk. Kum 2022 atang khan a hranpain email siam a ni a, Thu leh hla-a thu thawn duh atan email chu – editorthulehhla@gmail a ni. Tin, Thu leh Hla chanchinbu latuten awlsam zawka chanchinbu man an pek theihna atan Gpay hman a ni a, chanchinbu kawm hnung lamah QR code scan mai theiha dah a ni bawk. Thu leh Hla chanchinbu hi kum khat lak man Rs. 200 a ni.
Thu leh Hla chanchinbu hi a lo hlut zual zel theihna turin International Standard Serial Number (ISSN) nei tura hmalak mek a ni bawk.
Kum 2023 chhunga Thu leh Hla Editorial Board ni mek te chu :
Editor – Rev. Dr. Chuauthuama
Joint Editors – C. Lalnunchanga
Dr. H. Laldinmawia
C. Laizawna
Dr. Lalhlimpuii