H. Chhuma leh Kalveli te fa u ber niin Khawlkungi hi kum 1927 September ni 14-ah Mission Vengthlang, Aizawl-ah a lo piang a, pianpui unau panga a nei. Hmeichhe sikul, Aizawl atangin kum 1940-ah Middle a zo va. A hnu deuhah Private-a Matric exam a tum erawh chu a puitlin thei ta lo a ni. Kum 1960, January ni 23-ah Rualkhuma nen an innei a, fa pathum an nei nghe nghe.
Kum 1944 September ni 11-ah khawvel indopui pahnihna a zawm a, sipai (Women Auxiliary Corps) a zawm a, Airforce clerk hna a chelh a ni. Sipai hna kum thum a thawh chhung hian an Headquarter, Calcutta-ah a awm char char a ni. Indo zawh hnuin kum 1947-ah a bang a. PWD Clerk hna a chelh leh a, Under Matric tan kaisan a harsat avangin he a hna atangin kum 1991-ah a pension ta a ni.
Khawlkungi hian thuziak lam hi a bei hma hle a. Sipai a nih lai kum 1946 khan a thiante chanchin a lawrkhawmna ‘East Wind and West Wind’ thawnthu a ziak a. Hemi zawh hian Cowboy thawnthu ‘Realm of the Desert’ a letling bawk. Kum 1952-a indo chanchin ‘Sword of Fate’ a lehlin chu Mission Vengthlang Thalai Hmasawn Pawl-in kum 1972 khan an chhuah a. Bu hmasa pahnihte hi kutziak a nih laiin hawh bo a ni. Kum 1977- Central KTP-in thawnthu inphuahsiak a buatsaih khan ‘Zawlpala Thlan Tlang’ tih thawnthu hi pakhatna a nih pui nghe nghe.
Lemchan thawnthu ziah hi a tuipui hle bawk a, a lemchan ziah zingah hian Pangpar bawm (1972), te, Hmuh theih ka va duh em (1972) te, Rammawi kal kawng (1978) te leh, Monu Sual (1982) te hi a lar zualte an ni awm e. Thawnthu lamah pawh hian kutchhuak a nei nual a, chung zingah chuan Duhtak Sangpuii, A tlai lutuk ta, Fahrah nun leh Pasal duhthlan te hi a lar berte zinga mi an ni ngei ang. Naupang thawnthu lam pawh a ziak nasa hle a, Thawnthu za tih te, Naupang Thawnthu Pasarih tih te, Lal fapa leh kutdawh tih te, Krista thihni tihte hi a lar zual an ni awm e.
Thu leh hla ziah kawngah a inhmang nasa hle a, a bua chhuah aia tam mah hi Cyclostyle-in a thehdarh awm e. A kutchhuak hrim hrim hi thawnthu 50 chuang lai anga chhinchhiah a ni. Mizo thu leh hla tan a thawhhlawk em avangin India Civil mi chawimawina sang Padma Shri in Literature chu kum 1987 khan a dawng hial a. Kum 1998 khan Mizo Academy of Letters chuan Mizo Academy Award a hlan bawk.