J. Malsawma, Thanpuii Pa tia kan hriat lar hi kum 1928 khan Lungsum khuaah a lo piang a, a pa chu Lianhnawka Hmar a ni a, a nu chu Darlianthangi a ni.
Sakawrdai atangin zirna bul a tan a, kum 1940-ah Primary a pass a. An khuaah zirna chhunzawm theih a nih loh avangin kum 1941-ah Boy’s ME School, Sikulpui, Aizawl-ah a zir chhunzawm leh ta a. Kum 1943-ah chuan Middle English a zo ve leh ta a, ME a zir chhung zawng khan an pawlah a ti tha berte zinga mi a ni ziah a ni.
ME a pass kum khan Aizawl-ah Mizo High School a lo din ve tak avangin Aizawlah a zir zawm leh a. Kum 1948-ah chuan Gauhati University hnuai atangin Matric a pass leh ta a ni. Matric a pass hnu chuan Mizoramah zirna chhunzawm theih a nih loh avangin Shillong-ah a insuan leh a. Tichuan, IA chu kum 1950 khan a zo a, BA a zir zawm a. Kum 1952 khan BA a zo leh a, Gauhati University-ah MA a zir zawm a. Chumi pah chuan Bachelor of Law a zir pah a. Theihtawp chhuaha zir hnu, kum 1954-ah MA (Economics) chu a zo leh ta a, a duhthusam ang ngeiin kum 1956 khan Bachelor of Law pawh a pass leh a, Bachelor of Law-ah phei chuan University pumah pali-na a ni phak hial a ni.
M.A a pass hnua hna a thawh ve tan khan nupui nei rual nia inngaiin, kum 1958-ah chuan Vanlalrovi nen an innei a. Fanu pathum leh fapa pahnih an nei a. A nupui hian vanduaithlak takin kum 1982 khan a boralsan a, a fate zingah pawh a fanu Janet Lalthantluangi chauhin a dampui tawh a ni. Dan lama degree nei a nih avangin kum 1956-58 inkar khan Gauhati High Court hnuaiah Articled Clerk hna thawk a. 1958-ah Gauhati High Court hnuaiah Advocate hna a thawk leh ta a, he hna hi kum 1962 thleng a thawk a. Kum 1962-1971 inkar chhung khan Mizo District Court-ah Magistrate hna a thawk leh a, kum 1972-ah Mizoram chu Union Territory a lo nih khan Aizawlah a insuan lut ve ta a ni.
Sawrkar hna a thawh chhung hian chanvo pawimawh tak tak a nei a, kum 1972-75 khan Under Secretary-in a awm a, kum 1975-77 inkarah Deputy Secretary a ni a. Kum 1977-80 inkarah GAD, Joint Secretary hna a chelh leh bawk. Kum 1988-a Mizoram State puitling a lo nih khan Joint Secretary hna a chelh leh a, he hna hi a pension thlengin a thawk a. Sawrkar hna atanga a pension hnuah hian Planning Adviser hna chelh turin sawrkarin an ruai nawn leh a ni.
Hna a thawh hian a theihna zawng zawngin a thawk a, hna thawh mai mai a duh ngai lo. Hei vang hian a hnaah pawh hian fak a hlawhin, zah a kai hle a, “Theih tawp chhuah a hna thawh kha nuam ka ti a. Tin, ngun taka ka ngaihtuaha dik ni ngeia ka ngaih tawh hnua thutlukna ka siam hian keimah ngei pawh hi ka lawm thin. Tin, thil dik ni ngeia ka ngaih anga ka tih hi ka chhuang bawk thin a, mi dangin engtin nge an ngaih tih lam erawh ka ngaihtuah ber lem lo,” tiin a sawi hial a ni.
J Malsawma hian thu leh hlaah hian kut chhuak a ngah viau a, a kutchhuak tam tak zinga kan hriat lar zualte chu, ‘Thanpuii pa kutchhuak (1994)’, ‘Vanglai (1995)’, ‘Zo-zia’ (2000)-te hi an ni a. Heng bakah hian MZP Chanchinbu, Zoram Thupuan, Thlirvelna, Meichher leh Thu leh Hla chanchinbu-ah te vawi 80 chuang thu a ziak tawh a ni. A kutchhuak thu leh hla avangte hian Mizo Writers Association chuan tum li zet- 1990, 1993, 1996 leh 1999 khan a lo chawimawi tawh a. Mizo Academy of Letter pawhin Mizo Academy Award 2001 chu a lo hlan tawh nghe nghe. Heng bakah hian kum 2013 khan India Civil mite chawimawina sang ‘Padma Shri in Literature & Education’ a dawng nghe nghe a ni.