Pu B. Lalthangliana hi kum 1943, June ni 16 khan South Khawbung khuaah a lo piang a, a pa chu Ringchina a ni. Khawbungah hian pawl 4 thleng a zir hman a, hemi hnu hian khaw chhak lamah an pem a, zirna chu a bul atangin a tan tha leh a ni.
Kum 1975-ah Mandalay University atangin M.A (History) chu distinction-ah a pass ta a, kum 12 chhung zet Mandalay University-a History Department-ah a thawh hnuin kum 1986 khan Mizoramah a rawn haw leh a, Hrangbana College-ah leh Pachhunga University College-ah te lecturer hna a nghet lovin a thawk a, kum 1987 khan Hrangbana College-ah dah ngheh a ni ta a. Hrangbana College atang hian Associate Professor-in a pension ta a ni. Fapa 4 a nei a, hna tha tak tak chelhin an puitling vek tawh a, tunah hian Chhinga Vengah a khawsa mek a ni.
Kum 1961 vel atangin thu hi a ziak tan a, lehkhabu hi 64 a ziak tawh a, seminar paper 104 zet a ziak tawh bawk. A lehkhabu te hi Mizo tawng, Kawl tawng leh Sap tawng tea ziak a ni hlawm a. A lehkhabu tam ber hi Mizo history leh culture lam a ni ber a, literature lam lehkhabu pawh thahnem tak a ziak bawk. Lehkhabu a ziah bakah Mizo mi thiam hrang hrangte kut chhuak a lakhawm a, a bu-in a chhuah a. Ani zarah hian Mizo mi thiam tam tak kut chhuak kan hmuh theih phah a, Mizo literature tana a thawh hlawk hle a ni.
A lehkhabu ziah zinga hriat hlawh zualte chu – History of Mizo in Burma, Ka Lungkham, Mizo Nun Hlui Part I & II , History of Mizo Literature, Pi Pu Chhuahtlang, India, Burma & Bangladesh-a Mizo Chanchin leh Zoram Encyclopedia te an ni. A lehkhabu ziah pahnih – ‘Ka Lungkham’ (1989) tih leh ‘History of Mizo Literature’(1993) -te hi MAL Book of The Year atan thlan a ni tawh a, ‘Ka Lungkham’ tih phei chu MAL Book of The Year hmasa ber a ni nghe nghe bawk. Heng bakah hian chawimawina chi hrang hrang vawi sawm aia tam a dawng tawh a ni.