Thuhma
Mizo Academy of Letters (MAL) hian kum 1989 aṭang khan Book of the Year hi a thlang ṭan a, tun ṭum hi Book of the Year vawi 35 a thlanna a ni. Lehkhabu ṭha thlan hi thil awlsam tak chu a ni bik lo, Book of the Year Committee-in uluk taka an teh hnua ṭha an tihte hi MAL Executive Council-ah Top 20 aṭangin chhawp chhuah a ni ṭhin a, Executive Council-in a pawmpui hnuah chauh thlan fel ṭhin a ni. Book of the Year 2023 Committee atana ruatte chu heng a hnuaia mite hi an ni:
Chairman : Dr Darchuailova Renthlei
Secretary : Dr Lalzarzova
Member-te : Dr Lalropuia
Dr H. Lalbiakzuali
Thankima Hmar
A tirah Secretary atan hian H. Lalawmpuia ruat niin, lehkhabu a lo tihchhuah ve avangin Executive Council chuan Dr Lalzarzova hi a aiawh turin a ruat leh a ni. Book of the Year thlanna atan hian Mizo Academy of Letters (MAL) chuan tehfung (criteria) a siam a, a criteria siam chu hengte hi an ni:
- Originality and Creativity : 40
- Language : 25
- Philosophy : 25
- General Impression : 10
Hetianga tehfung siam a nih bakah hian mimal kutchhuak ni lo, edited book te, lehlin te, reprint te, lehkhabu danga lo chhuah ṭhen tawh chhuah ang chite chu thlan a remti lo bawk a, lehkhabu atan hian phek 50 chin pawm a ni bawk. Social media leh electronic media danga lo tihhchuah tawh, mahse a bu-a la tihchhuah ni lote erawh chu pawm a ni thung.
Kum 2023-a chhuak lehkhabute
Mizo Academy of Letters (MAL) hian lehkhabu hi a thlawnin a dawng ṭhin a, lehkhabu chhuak zawng zawng erawh a dawng vek ngai bik lo. Hetiang a nih avang hian lehkhabute hi MAL sumin lei khawm ṭhin a ni. Kum 2023 chhunga lehkhabu chhuakte hi theih ang anga lak khawm a ni a, Kohhran annual report te, veng bil souvenir ang te hi lak khawm kim vek theih a ni ṭhin lo va, chuti chung chuan theih ang angin lehkhabute hi dap khawm a ni ṭhin. Kum 2023 chhung hian Book of the Year Committee chuan lehkhabu 170 chhuak angin a chhinchhiah a, hei hi kan hriat theih chin a ni.
Book of The Year 2023 Thlan Dan
Book of the Year 2023 Committee hi January 12, 2024 khan a vawi khatna atan ṭhut khawm a ni a, a zavaiin vawi nga ṭhut khawm a ni. Uluk taka Book of the Year Committee-in Top 20 atana a thlante chu Executive Council-ah chhawp chhuah a ni a, chhawp chhuah a nih hnuah heng a hnuaia mite hi Book of the Year 2023, Top 20 atan pawm a ni:
Sl No | Lehkhabu hming | A ziaktu/chhuahtu | Genre |
1 | Angelten an awmpui | Lalrammawia Ngente | Fiction |
2 | Hniak Hlu | Zaii Khiangte | Essay Collection |
3 | Kan Sulhnu | CL Ruala | Autobiography |
4 | Kan Ti Thei | Chhuana Fanchun | Essay Collection |
5 | Kristian Khawhawi | Ramengliana | Essay Collection |
6 | Lentlang Bingbi | Tlanglawmkima Chhakchhuak | Critical Appreciation |
7 | Linguistics Kamkeuna | R. Ramdinmawii | Language |
8 | Mizo National Movement Memoirs | Lalkhawliana | Autobiography |
9 | Mizoram Thlirna | Lalkhama IAS (Trd) | Critical Essay |
10 | Mizote Thlang Tlak Thu | C. Chhuanvawra | History |
11 | Pangparhnima | Ahmangaihi Khiangte | Novel |
12 | Pathian Min Hruaina Ropui leh Mak Tak Mai Chu | Rev. Dr. Zaihmingthanga | Autobiography |
13 | Raltiang Rimawi | Lalhruaitluanga Chawngte | Essay Collection |
14 | Ram Zûn Ngaih leh Dî Zûn | B. Vanlalvuana | Novel |
15 | Thingserh-II | F. Vanlalrochana | Essay |
16 | Thingthlavar | Nununa Renthlei | Poetry |
17 | Thlirtu Khawthlir | Rosangzuala (Rsa Thawmte) | Essay |
18 | Vanram Tlafual | Vanneihthanga | Essay |
19 | Ziakfung Zalen Bu 2-na | H. Lalawmpuia | Criticism |
20 | Zobawm Nula leh Keimi | K. Vanlalneiha | Novel |
Book of the Year 2023, Top 10 chu Executive Council-ah chhawp chhuah leh niin, heng a hnuaia mite hi thlan an ni:
Sl. No | Lehkhabu hming | A ziaktu/chhuahtu | Genre |
1 | Angelten An Awmpui | Lalrammawia Ngente | Novel |
2 | Hniak Hlu | Zaii Khiangte | Essay/Article |
3 | Mizo National Movement Memoirs | Lalkhawliana | Autobiography |
4 | Mizoram Thlirna | Lalkhama IAS (Rtd) | Critical Essay |
5 | Pangparhnima | Ahmangaihi Khiangte | Novel |
6 | Raltiang Rimawi | Lalhruaitluanga Chawngte | Essay/Article |
7 | Thingthlavar | Nununa Renthlei | Poetry |
8 | Thingserh-II | F. Vanlalrochana | Essay/Article |
9 | Ziakfung Zalen Bu 2-na | H. Lalawmpuia | Criticism |
10 | Zobawm Nula leh Keimi | K. Vanlalneiha | Novel |
Book of the Year 2023, Top 10 thlan a nih hnu-ah Executive Council-ah Book of the Year 2023, Top 3 tur chhawp chhuah leh a ni a, uluk taka sawi ho a nih hnuah heng a hnuaia mite hi thlan an ni:
Sl. No | Lehkhabu hming | A ziaktu/chhuahtu | Genre |
1 | Hniak Hlu | Zaii Khiangte | Essay/Article Collection |
2 | Pangparhnima | Ahmangaihi Khiangte | Novel |
3 | Raltiang Rimawi | Lalhruaitluanga Chawngte | Essay/Article Collection |
Book of the Year 2023, Top 3 thlan a nih hnu hian Book of the Year atana Committee-in a rawt chu Executive Council-ah chhawp chhuah leh a ni a, Book of the Year 2023 atan chuan Ahmangaihi Khiangte ziah, ‘”Pangparhnima” tih chu thlan a ni ta a, chawimawina thuchei hetiang hian ziak a ni:
‘PANGPARHNIMA’
AHMANGAIHI KHIANGTE
He thawnthu hian mihring nuna mi tin paltlang, ṭhatlai hun hlimthla a din a; suangtuahna khawvelah min hruaiin, a tak ang maia chiangin min hmuhtir a ni. Mihring nun hi a lan dan ang ngawt a ni lo tih fiah taka kawhhmuhin, kan lan dan piahah hian kan nihna dik tak a awm tih a tar lang. Hun harsaa ṭhian hlutna te, a tawpa diknain hnehna a chan dan te, thihna ruamah pawh beiseina nung a siam a; chu beiseina chu a chhiartute hai chhuah tura dahin, hringnun min thlirtir a ni. Chung thil hrang hrang chu hmangaihna zunzâma phuar khawmin hringnun darthlalang a hung a; a changtute leh an mize duan kawngah bung thar min kaipui a ni.
Chuvangin, Mizo Academy of Letters chuan kum 2023 chhunga Mizo ṭawnga lehkhabu chhuak zinga ṭha ber, Book of the Year 2023 atan a thlang a ni.
Tawpna
Book of the Year 2023 Committee chuan theihtawp a chhuah a, lehkhabute la khawmin uluk taka chhiar a ni a, lehkhabu ṭha tak tak an ni hlawm. Book of the Year 2023 tur thlanna kawngah hian committee chuan uluk takin a ngaihtuah ṭhin a, tehfung hrang hrang aṭanga teh leh thlirin, duhsak bik tumah nei lovin, Executive Council-a chhawp chhuah a nih hmain ngaihtuahna tam tak sengin lehkhabute hi a thlang a ni. Kum 2023, Book of the Year atana thlan tak “Pangparhnima” pawh hi Book of the Year Committee chuan uluk taka a ngaihtuah hnuah lungrual takin a thlang a ni. Executive Council hian lehkhabu kan chhawp chhuahte uluk taka min thlirpuiin fimkhur takin engkim kalpui a ni a, Executive Council member-te chungah pawh lawmthu kan sawi a ni. Book of the Year 2023 Committee hi kan inlungrualin kan thawh hona a ṭha hle a, kan Chairman, Dr Darchuailova Renthlei leh member dangte chungah pawh lawmthu ka sawi a ni.
(Hei hi Dr. Lalzarzova, Secretary, Book of the Year 2023 Committee-in April ni 23, 2024-a MAL Foundation Day-a a report a ni).