September ni 29, 2023 khan Art & Culture Auditorium, Lunglei-ah Mizo Academy of Letters (MAL), Aizawl leh Mizo Academy of Letters (MAL), Jt. Hqrs Lunglei ṭang dunin a buatsaih Leitlangpui Ziak Mite Kutchhuak leh An Chhehvel Dan Zir Chianna Seminar hman a ni a, he hunah hian Pu C. Lalrinsanga, Minister, Agriculture, Irrigation & Water Resources leh Cooperation Department changtu chu khuallian a ni a, Dr. Vanlalṭanpuia, MLA & Chairman, Mizoram Youth Commission chu khualzahawm a ni.
Seminar hi Prof. R.L. Thanmawia, President, MAL chuan a kaihruai a. Khuallian Pu C. Lalrinsanga chuan thu sawiin, thil ziak leh document dah ṭhat a pawimawh thu a sawi a, document hlui ṭangkai zawka hman a nih theih nan leh neih theihna dan chu cabinet meeting pawhin a pawm a ni a ti. Ziak mite dawm kân nan an thu ziakte pho lan leh promote a ṭul thu a sawi a, ziak mite hian thil chi hrang hrang — kan ram economy a san theih nana ei leh bara intodelh te, hnam anga ke kan pennaah hnam dinchhuah nan nationalism te, faina kawngah te, rinawmna hlutzia leh inrenchemna hawi zawng thu ziak tam ni se, a hlu hle dawn hle a ni a ti. Hemi bakah hian kut hnathawh uar lam hawi zawnga ziah te hi a ṭangkai tur thu sawiin Mizo ṭawng hman dik leh lam dik lama kan hausak zawk nan ṭan lak a ngaih thu a sawi bawk.
Khualzahawm Dr. Vanlalṭanpuia, MLA & Chairman, Mizoram Youth Commission (MYC) pawhin thu sawiin ram leh hnam ropui apiangin ziak mite sulhnu hnutchhiah hi an ngai pawimawh a, ṭhangthar leh mi thiamte’n research tih nan an hman ṭhin thu a sawi a. Mizo history chawi nun te, thil bul chhui nan te a ṭangkai tur thu a sawi bawk. Mizo ziak mite thu ziaka hausa tur chuan thu inchuh (debate) lian tak buatsaih a ngaih dan hrang hrang sawi chhuah ni thei se a ṭangkai tur thu sawi a, thu leh hla lama hma kan sawn theih nan ṭawng hman dik uluk a ngaih thu a sawi a ni.
Seminar thupui zir hi hun hniha ṭhen niin hun khatna hi Pu C. Laizawna, Executive Committee Member, MAL Aizawl kaihhruainaah hian Pi C. Lalruatpuii, Asst. Professor, Lunglei Govt. College-in Lalzova leh Art; Pu C. Zalianthanga, Tahan, Myanmar-in Mizo thu leh hla ṭona, Leitlangpui; Pu T. Vanlalhruaia’n C. Ṭhuamluaia Sulhnu leh Pu Familia Lalṭansanga Fanai-in Saikuti Hlaa Khuarel tih thupui an zir ho a ni. Thupui zir thawh hnihna hi Pu K. Vanlalzama, Asst. Treasurer MAL, Jt. Hqrs. Lunglei chuan kaihruaiin Pu K. Lalringzuala Pachuau-in Chhawnthang pa leh a hlate, Pu Lalrinchhana, PG zirlai Pachhunga University College-in H. Lalringa hlaa khuarel thilsiam tar lan anih dan, Pu Lalhlimpuia, Lecturer, Baptist Higher Secondary School, Serkawn-in Serkawn Concert Hlaten Mizoram Mawina an pho chhuah dan leh Pu Rochharzela, Asst. Professor, Lunglei Govt. College-in Leitlangpui ziak miten Lunglei an tar lan dan te an a buatsaihte chu an zir ho a ni.
Seminar hawnnaah hian Pu C. Hrangdula, President, MAL. Jt. Hqrs. Lunglei-in inlawmna thu a sawi a, Pu TC Jonunsanga, Coordinator/Secretary, MAL, Jt. Hqrs, Lunglei-in keynote sawiin Pu K. Darchhawna, Vice President, MAL, Jt. Hqrs. Lunglei-in lawmthu a sawi a, zawhna leh chhanna hun hman a ni bawk.
