Thuhma
Mizo Academy of Letters (MAL) hian kum 1989 atang khan Book of the Year hi a thlang tan a, tun tum hi Book of the Year vawi 33 a thlanna a ni. Mizorama lehkhabu mal tha thlannaah chuan mipuite ngaihhlut hlawh ber a tih ngam awm e. Lehkhabu tha tih a inang vek thei lo va, Mizo Academy of Letters hian Mizo tawnga lehkhabu chhuak zinga tha a tih ber a thlang thin a ni tih hi kan hriat reng a tha awm e. Book of the Year hi hawi zawng hrang hrang neia la kalpui a nih loh avangin hawi zawng (genre) hrang hrang neite huang khata khung khawm vek a la ni a, hei hian a thlangtu leh mipuite-ah pawh ngaihdan inang lo a siam chang a awm thei ang. Fiction leh Non-fiction tala then hran theih hun a nghahhlelhawm khawp mai. Mipuiin Book of the Year kan hlut chho zel a, hei hi thil lawmawm tak a ni. Lehkhabu tha thlan hi thil awlsam tak chu a ni bik lo, Book of the Year Committee-in uluk taka teh hnua tha an tihte hi MAL Executive Council-ah Top 20 atangin chhawp chhuah a ni thin a, Executive Council-in a pawmpui hnuah chauh thlan fel thin a ni. Book of the Year 2021 Committee atana ruatte chu heng a hnuaia mite hi an ni:
Chairman : Dr Zoramdinthara
Secretary : Lalzarzova
Member-te : Dr H. Laldinmawia
Dr Lalhlimpuii
Vanlaltana Khiangte
Book of The Year Lehkhabute
Mizo Academy of Letters-in Book of the Year a thlan hmasak ber atanga chhûtin he lawmman hlu tak lo dawng tawhtu hi mimal 27 an awm a, vawi hnih dawng hi tun tuma mi nen hian mi panga – B. Lalthangliana (Ka Lungkham 1989, Mizo Literature 1993), C. Laizawna (Hmangaihzuali 1990, Anita 1998), Lalhriata (Damlai Thlipui 2002, Chun Chawi Loh 2008), C. Lalnunchanga (Pasalthate Ni Hnuhnung 2006, Kawlkil Piah Lamtluang 2015) leh Lalhruaitluanga Chawngte (Aizawlah Aizawler 2016, Hnam Ropuite U Tho R’u Le 2021) an awm ta chiah bawk a ni. Bangalore Mizo Christian Fellowship-in vawi khat a dawng tawh bawk. Hmeichhe lam kutchhuak hi mipa lam nena han buk chuan a la tlem tham deuh a, mipa hian vawi 24 an dawn tawh laiin hmeichhia chuan vawi 3 chauh an la dawng a ni. Mizo hmeichhe thuziak thinte tan an lak zel a la ngai. Book of the Year atana thlan hlawh ber chu Thawnthu (Novel) a ni a, vawi 33-ah hian vawi 17 chu Thawnthu (Novel) hian Book of the Year lawmman a hauh a, Lemchan (Drama) hian vawi khat a hauh tawh a, Article/Essay chilh khawm bu hian tun tuma mi nen hian vawi 7, Book of the Year lawmman a lakna a ni. History lam hawi hian vawi thum a hauh tawh a, Ramfan Bu (Travelogue) kan tih hian vawi khat hauh tawhin, Critical Writing hian vawi hnih a hauh tawh bawk. Christian Literature hian vawi hnih hauh tawhin; Book of the Year-ah hian lehkhabu hawi zawng hrang hrang nei a lut tam tawh khawp mai a, chutih rualin literary genre hlawm lianpui pui pathum Poetry, Drama leh Novel-ah hian Novel hian duhsakna a dawng bik emaw tih mai a awl viau; Poetry hian vawi khat mah lawmman a la la ve lo va, Drama hian vawi khat chiah a la dawng bawk a ni. Kan hriat tel tur chu Book of the Year-ah hian lehlin bu a tel thei lo va, inkaihhruaina fel tak Mizo Academy of Letters hian a siam vek a ni. Book of the Year lo dawng tawhte han tar lang ia:
Sl. No. | Kum | Lehkhabu | Ziaktu |
1 | 1989 | Ka Lungkham | B. Lalthangliana |
2 | 1990 | Hmangaihzuali | C. Laizawna |
3 | 1991 | Zoram Khawvel-I | L. Keivom |
4 | 1992 | Ṭhangthar Taitesena | Romawia |
5 | 1993 | Mizo Literature | B. Lalthangliana |
6 | 1994 | Kum za Kristian Zofate Hmabâk | Bangalore Mizo Christian Fellowship |
7 | 1995 | Ram leh I Tan Chauh | H. Lallungmuana |
8 | 1996 | Bible leh Science | P.C. Biaksiama |
9 | 1997 | Pasalṭha Khuangchera | Laltluangliana Khiangte |
10 | 1998 | Anita | C. Laizawna |
11 | 1999 | Tlawm ve lo Lalnu Ropuiliani | Lalsangzuali Sailo |
12 | 2000 | Chawngmawii leh Hrangchhuana | R. Rozika |
13 | 2001 | Ka Khualzin Kawng | Robuanga |
14 | 2002 | Runlum Nuthai | L.Z. Sailo |
15 | 2003 | Kan Bible Hi | Zairema |
16 | 2004 | Zorinpari | H. Lalngurliani |
17 | 2005 | Damlai Thlipui | Lalhriata |
18 | 2006 | Pasalṭhate Ni Hnuhnung | C. Lalnunchanga |
19 | 2007 | Zofate Zinkawngah | R. Zamawia |
20 | 2008 | Chun Chawi Loh | Lalhriata |
21 | 2009 | Rintei Zunléng | Lalrammawia Ngente |
22 | 2010 | Beiseina Mittui | Samson Thanruma |
23 | 2011 | Zodinpuii | Lalchhantluanga |
24 | 2012 | Sihlipui | Romuanpuii Zadeng |
25 | 2013 | Thinglubul | Lalpekkima |
26 | 2014 | Ka Zalenna | B. Lalhriattira |
27 | 2015 | Kawlkil Piah Lamtluang | C. Lalnunchanga |
28 | 2016 | Aizawlah Aizawler | Lalhruaitluanga Chawngte |
29 | 2017 | Savun kawrfual | Lalhmingchhuanga Zawngte |
30 | 2018 | Hringnun Hrualhrui | H. Lalrinfela (Mafaa) |
31 | 2019 | Falung | Lalengzauva |
32 | 2020 | Eng Nge I Zawn | Rema Chhakchhuak |
33 | 2021 | Hnam Ropuite U Tho R’u Le | Lalhruaitluanga Chawngte |
Book of The Year 2021 Committee
Book of the Year 2021 Committee hi December 21, 2021 khan a vawi khatna atan meeting a ni a, hripui leng avangin online-in kan meeting a ni. A zavaiin vawi nga meeting neih a ni. Mizo Academy of Letters (MAL), Executive Council-ah Top 20 chhawp chhuah a ni a, heng lehkhabu sawmhnihte hi a review ziah vek niin, committee member-ten review hi chhiar nawn lehin uluk takin Top 20 tur hi Executive Council-ah chhawp chhuah a ni. Chhawp chhuah a nih hnuah heng a hnuaia mite hi Book of the Year 2021 Top 20 atan pawm a ni:
Sl. No. | Lehkhabu Hming | Lehkhabu Ziaktu |
1 | A Tlafir | R.L. Hmangaiha |
2 | Eng Nge I Ngaih Ve Dan | P.C. Lawmkunga |
3 | Hnam Ropuite U Tho R’u Le | Lalhruaitluanga Chawngte |
4 | Hringnun Hlapui & Zo Lunglen | Thuamtea Khawlhring |
5 | Hrui Kim Lo Rimawi | C. Januari |
6 | Kan Ram leh Hnam Humhalh Nan | Lalthara IAS |
7 | Keimah Ni Lovin Krista Zawk | Rev. Lalthanzauva |
8 | Kristian Apologetics | P.C. Lalropuia |
9 | Mizo Buanpuite | Lalhmingchhuanga Zongte |
10 | Mizo Tawng Ri Ziarang | Dr Laltleipuii |
11 | Mualzam Hmun | J.H. Lalrinzuala |
12 | Reh Ri | Zirsangkima |
13 | Seih | Lalremruati Ngente |
14 | September Zunzâm | P.C. Lalrinliani |
15 | Thulovi Thu | Gladys Lalhruaitluangi |
16 | Vangvat Kai Lai Nite | Capt. Lalthlana Sailo |
17 | Vankhama Thulehthliah Thiam | Darchuailova Renthlei |
18 | Vaphai Lui Thuruk | Lalthuamliana |
19 | Zawhna Zawttu Chhanna | Zonunmawia |
20 | Zomors Zunzam | Zoremi Hmar Zote |
Book of the Year 2021 Top 10 chu Executive Council-ah chhawp chhuah leh niin, heng a hnuaia mite hi thlan an ni:
Sl. No. | Lehkhabu Hming | Lehkhabu Ziaktu |
1 | Hnam Ropuite U Tho R’u Le | Lalhruaitluanga Chawngte |
2 | Hrui Kim Lo Rimawi | C. Januari |
3 | Kristian Apologetics | P.C. Lalropuia |
4 | Mizo Buanpuite | Lalhmingchhuanga Zongte |
5 | Mizo Tawng Ri Ziarang | Dr Laltleipuii |
6 | Mualzam Hmun | J.H. Lalrinzuala |
7 | September Zunzâm | P.C. Lalrinliani |
8 | Vankhama Thulehthliah Thiam | Darchuailova Renthlei |
9 | Zawhna Zawttu Chhanna | Zonunmawia |
10 | Zomors Zunzam | Zoremi Hmar Zote |
Book of the Year 2021 Top 10 thlan a nih hnu-ah Executive Council-ah Book of the Year 2021 Top 3 tur chhawp chhuah leh a ni a, uluk taka sawi ho a nih hnuah heng a hnuaia mite hi thlan an ni:
Sl. No. | Lehkhabu Hming | Lehkhabu Ziaktu |
1 | Hnam Ropuite U Tho R’u Le | Lalhruaitluanga Chawngte |
2 | Mizo Buanpuite | Lalhmingchhuanga Zongte |
3 | Vankhama Thulehthliah Thiam | Darchuailova Renthlei |
Book of the Year 2021 Top 3 thlan a nih hnu hian Book of the Year atana Committee-in a rawt chu Executive Council-ah chhawp chhuah leh a ni a, Book of the Year 2021 atan chuan Lalhruaitluanga Chawngte ziah, ‘Hnam Ropuite U Tho R’u Le’ tih chu thlan a ni ta a ni.
Kum 2021 atana Book of the Year thlannaah hian lehkhabute hi Bookroom hrang hrang leh mimal lehkhabu dawrah te kal kualin lak khawm a ni a, kum 2021-a chhuak lehkhabu kan lak khawm theih chin hi a vaiin 170 a ni. Heng lehkhabu 170 atang hian Book of the Year 2021 hi thlan a ni.
Tawpna
Book of the Year 2021 Committee chuan theihtawp chhuahin lehkhabute la khawmin uluk takin chhiar a ni a, lehkhabu tha tak tak an ni hlawm. Book of the Year 2021 tur phei hi chu uluk lehzualin Committee hian Executive Council-a a chhawp chhuah hma pawhin a thlir nawn a, sawi ho a nih hnuah mark te pawh pek a ni. Lehkhabu lak khawm kawngah leh kan lehkhabu chhawp chhuahte uluk taka min lo zirpui avangin Executive Council member-te chungah lawmthu kan sawi a, Book of the Year 2021 Committee hi kan inlungrualin kan thawh hona a tha a, kan Chairman, Dr Zoramdinthara leh member dangte chungah pawh lawmthu ka sawi a ni. Book of the Year Committee din a nih hnuah pawh hripui leng a ziaawm theih lawk loh avangin hma kan la chak lutuk thei lo va, MAL Foundation Day-a Book of the Year hi puan a ngaih bawk si avangin kan theih ang tawkin kan thawk a, duhthusam lo lai leh fel tawk lo a awm a nih chuan Committee aiawh pawhin thupha ka chawi a ni.
(Hei hi Lalzarzova, Secretary, Book of the Year 2021 Committee-in April ni 23, 2022-a MAL Foundation-a a a report a ni).