Mizo Academy of Letters (MAL) chuan vawiin April 26, 2023 khan Central YMA Conference Hall, Tuikhuahtlangah MAL din champha lawmna hun a hmang a; kum 2022 chhunga Mizo tawng lehkhabu chhuak zinga tha ber ‘Book of the Year, 2022’ atana thlan Dr. Zohmangaihi ziak Daidanna Bang Phena Thuruk hnenah khuallian Pu R.Lalzirliana, Art & Culture Minister chuan chawimawina thuchei (citation) leh pawisa fai Rs. 10000 a hlan a ni.
MAL President, Prof. RL Thanmawia kaihhruai he inkhawmah hian, Book of the Year thlangtu Committee Secretary, Dr. C. Lalawmpuia Vanchiau-in a tar lan dan chuan, kum 2022 chhung khan lehkhabu 203 a chhuak a, hêng zîngah hian hmun hniha ṭhena hmun khat aia tam chu Christian Literature a ni. Lehkhabu khâwn khawm zîngah hian bu 5 hi Myanmar rama chhut leh chhuah a ni a, Tripura lam chhuak 2 a awm bawk. Hêng lehkhabu atang hian lehkhabu 36-ah insawrbing a ni a, chuta tang chuan top 20 thlan a ni a, chumi hnuah top 10 thlan leh niin chuta tang chuan Top 3 thlan leh a ni a, tichuan a tawpah Dr. Zohmangaihi ziak, Daidanna Bang Phena Thuruk tih chu a thlang ta a ni.
MAL din champha leh Book of the Year lâwmman hlan inkhawmah hian MAL member ziak lehkhabu 4 chu khuallian Pu R. Lalzirliana hian a tlângzarh a, Mizo tawng humhalh leh tihhmasawn chu hnam tana thil pawimawh tak a nih thu a sawi a ni. He inkhawmah hian Mizoram district hrang hrang leh Myanmar lam atanga MAL member thahnem tak an tel a ni.
Min tibengvar e.